أشياء يجب عليك الاهتمام بها أثناء كتابة السيرة الذاتية

VectorStock.com/10523130

تواجهنا العديد من العقبات عند كتابة السيرة الذاتية، من أهم هذه العقبات هي عدم كتابة السيرة الذاتية بشكل صحيح مما يؤثر على قرار مسؤول التوظيف بعدم قرائتها. في هذا المقال أستعرض معكم بعضًا من الإرشادات التي يجب الاهتمام بها أثناء كتابة السيرة الذاتية.

1- Don't bury the good stuff (Highlight them)

بيّن الحاجات الكويسة اللي انت عملتها في السيرة الذاتية، متحطهاش بين بقية الكلام كدة كإنها حاجة عادية، لأ علّمها ووضحها سواء بكتابتها في الأول أو إن الخط بتاعها يبقى عريض

2- Make it effortless for the reader

كل ما كانت السيرة الذاتية بتاعتك سهلة القراءة كل ما فرصة إن الشخص المسؤول يقرأها أكتر، طيب يعني إيه سهلة القراءة؟

- التنسيق يكون مظبوط

- الترتيب يكون ترتيب صح (التفاصيل الشخصية - الهدف - الخبرة - التعليم - اللغات - المهارات)

- الكلام المكتوب يكون بخط واضح، وميكونش فيه تفاصيل ملهاش لازمة

- عدم استخدام الألوان إلا في حالة التقدم مثلًا لوظيفة جرافيك ديزاينر أو شيء من هذا القبيل

3- Tailor your resume to the job (add-in keywords)

وده خطأ بيقع فيه ناس كتير وهو إنه يبعت السيرة الذاتية بتاعته لشركات كتير بدون أي تعديل على السيرة الذاتية، اتعود إنك تعدل في السيرة الذاتية بتاعتك طبقًا للمكان اللي مقدم عليه، يعني لو مقدم على وظيفة إدارية فخلي السيرة الذاتية بتاعتك تكون مبينة خبراتك الإدارية، لو مقدم على مصنع فخلي السيرة الذاتية تكون مبينة خبراتك في التصنيع، وهكذا

4- Don't just say it, prove it. (Add the evidence)

لما تقول إنك عندك خبرة في حاجة معينة، وضح الخبرة دي بنوع من التفصيل، اثبت إنك عندك الخبرة دي عن طريق إنك تقول كنت بتعمل إيه بالظبط والشهادات اللي أخدتها في المجال ده

5- Replace "Objective" with a statement of how you can add value.

خطأ بيقع فيه البعض برضو وبيكتب في الObjective في أول السيرة الذاتية الحاجة اللي هو عايز يعملها وتخصه، زي إنه بيتطلع لوظيفة تديله مهارات ..الخ.

وده مش الصح، الصح إنك تكتب في الجزئية دي إيه القيمة اللي انت هتقدمها.

6- Say what you solved, not what you did.

معنى الكلام إنك متكتبش مثلًا أنا كنت مدير لفريق مكون من 8 أفراد، لأ قول انت عملت إيه، انت طبيعي تكون مدير ل8 أفراد لإن دي الشغلانة لكن عرفني بقى إيه اللي انت عملته مع ال8 أفراد دول، وإيه اللي انت ضيفته للمكان..الخ.

7- Your resume has to pass the 15 seconds test.

طبعًا في ظل الكم الهائل من التقديم على الوظايف، بالتأكيد مسؤول التوظيف مش بيبص على كل السير الذاتية اللي بتتبعتله، هو بيبص كدة في ثواني على السيرة الذاتية ولو عجبته بيكمل، معجبتوش بيطنشها

فحاول بقدر الإمكان تخلي السيرة الذاتية بتاعتك قابلة إنها تعدي اختبار ال15 ثانية ده، وده عن طريق الالتزم بالإرشادات اللي فوق، وإنك توري السيرة الذاتية بتاعتك لبعض المختصين وتسألهم برضو على رأيهم وهل فيه أي إضافات ولا لأ

8- Your resume is a sample of your work.

السيرة الذاتية هي جزء منك وبتعبر عنك، أي غلطة في السيرة الذاتية ممكن مسؤول التوظيف ياخدها على محمل الجد، بمعنى مثلًا متكونش مقدم على وظيفة محتاجة شخص عنده مستوى عالي من الدقة ومسؤول التوظيف يلاقي غلطة كتابية أو غلطة نحوية في السيرة الذاتية بتاعتك

دي كانت بعض الحاجات اللي لازم تكون مهتم بيها أثناء كتابة السيرة الذاتية، طبعًا انت لازم تشوف صور لسير ذاتية وتقرأ تعليمات كتابة السيرة الذاتية، لكن دي حاجات ممكن متكونش موجودة في التعليمات دي فاهتم بيها