سمعنا كتير الفترة اللي فاتت عن كلمة اليقظة الدوائية أو الPharmacovigilance، طيب إيه هي اليقظة الدوائية دي وازاي ندرسها ونشتغل فيها؟ ده اللي هنتكلم عنه في المقالة الأولى من مقالات الحديث عن وظايف الصيدلي.
في الحقيقة على الرغم من إن مصطلح اليقظة الدوائية اتشهر من فترة قريبة، إلا إنه كان موجود من زمان أوي، من حوالي 170 سنة.
 |
| Hannah Greener and Chloroform |
في سنة 1848، بنت بريطانية اسمها Hannah Greener عندها 15 سنة، كانت مريضة بمرض معين والأطباء قرروا إنها هتعمل عملية، واستخدموا في التخدير مخدر الكلوروفورم، وفي خلال دقيقيتن كانت البنت ماتت. قبل كدة مخدر الكلوروفورم كان تم إكتشافه إنه من أقوى وأأمن المخدرات اللي ممكن يتم استخدامها، فموت البنت في الحالة دي أدى إنهم يفحصوا الحالة ويعرفوا هي ماتت بسبب إيه بالظبط، لكن كان مستحيل ساعتها يتعرف بالظبط هي ماتت بسبب إيه.
بعد كدة حصلت كذا حالة مشابهة إنها تموت بعد التخدير، وده خلى مجلة The Lancet يصدر بيان بيوجه فيه كل الدكاترة إنهم يرصدوا حالات الموت بالتخدير ويبعتوا للمجلة.
في 1961 حصلت حاجة تانية، وهي إن دكتور أسترالي بعت رسالة لمحرر مجلة The Lancet بيذكر فيها إنه شاكك إن فيه علاقة بين تشوه الأجنة ومادة الThalidomide، وإنه لاحظ إن حالات التشوه الجنيني زادت من 1.5% لـ 20% عند الحوامل اللي أخدوا المادة دي أثناء الحمل، ودكتور تاني في ألمانيا نشر في مجلة ألمانية في نفس الوقت عن نفس الموضوع والشكوك بتاعته. وفي 1973 أثبتت دراسة بحثية إن فيه علاقة بين الـThalidomide وتشوه الأجنة. والموضوع ده وضح أهمية إن مينفعش الدواء يتم الاعتماد فيه على الأبحاث اللي قبل التصدير في السوق، وبدأ يشدد على أهمية مراجعة الأدوية من الشركات بعد التسويق ليها.
 |
| رسالة الدكتور الأسترالي إلى مجلة لانست |
ومن خلال المقدمة التاريخية دي بيتوضحلنا باختصار شديد جدًا اليقظة الدوائية عبارة عن إيه، هي فكرة إن يتم مراجعة الأدوية بعد خروجها في السوق، وتقديم تقرير دوري وقت ما يحصل أي ضرر جانبي غير متعارف عليه عن الدواء ده.
Pharmacovigilance (PV) is defined as the science and activities relating to the detection, assessment, understanding, and prevention of adverse effects or any other drug-related problem. - WHO
في عام 1961 بعد حدوث كارثة الـ Thalidomide، منظمة الصحة العالمية قامت بإنشاء برنامج مراجعة الأدوية العالمي International Monitoring Drug Programme، وحاليًا مقر البرنامج ده بيقع في منطقة اسمها Uppsala، والمركز اسمه Uppsala Monitoring Center وهو المسؤول عن كل ما يخص اليقظة الدوائية حول العالم.
 |
| Uppsala Monitoring Center Logo |
وبناءًا على كل ما سبق، كل شركات الأدوية لازم بيكون فيها قسم اليقظة الدوائية واللي بيكون مسؤول عن مراجعة الدواء بعد ما بينزل السوق وإعداد التقارير اللازمة وإرسالها إلى الجهات المعنية.
والشخص اللي بيشتغل في اليقظة الدوائية بيكون اسمه QPPV وهي اختصار لكلمة Qualified Person Responsible For Pharmacovigilance، وفي بعض الأحيان قد يكون اسمها Pharmacovigilance Associate. تختلف الأسماء لكن يظل نفس اللي بيعملوه واحد.
طيب منين ندرس اليقظة الدوائية ونتعلمها عشان نقدر نشتغل في المجال؟
هتلاقوا في اللينكات اللي في آخر المقالة مصادر مختلفة منها:
1- كورسات مجانية للمبتدئين في المجال على موقع Uppsala Monitoring Center
2- قوائم تشغيل على اليوتيوب بها مواضيع متقدمة عن اليقظة الدوائية
3- كتب خاصة باليقظة الدوائية (عربية وإنجليزية)
4- كورسات خاصة باليقظة الدوائية من المنظمة الأوروبية للأدوية European Medicines Agency
5- كورس عن التطبيق الجيد لليقظة الدوائية (Pharmacovigilance (GVP
وطبعًا ممكن تدرس دبلومة اليقظة الدوائية واللي بتقدمها بعض كليات الصيدلة للخريجين.
يُفضل التدريب في مجال اليقظة الدوائية في أي شركة أدوية، ومش لازم تنتظر إن الشركة تفتح التدريب، ممكن انت لما تدرس شوية ويبقى عندك معرفة في المجال تكلم المسؤولين عن اليقظة الدوائية في الشركات المختلفة (من خلال LinkedIn كمثال) وتسألهم عن إمكانية التدريب.
الملفات التعليمية كلها موجودة في الـ 3 روابط دول، تقدر تحملهم (ملفات PDF بداخلها الروابط مجمعة) وتشوف منهم اللي انت عايزه:
طريقة التحميل: اضغط على Free Download، وبعدها هيفتحلك صفحة تانية ويطلب منك تستنى 30 ثانية، هتحل الCaptcha وتدوس على Create a download link، وبعدها دوس على اللينك اللي هيظهرلك وهيتحمل معاك الملف.
----
المصادر:
World Health Organization
Comments
Post a Comment