للصيادلة الراغبين في دراسة المعادلة الكندية أو الألمانية

نقلًا عن دكتور محمد السيد، رابط منشور الفيس في نهاية المقال.

من سنه تقريباً كنت حطيت فكره أنا و صديقي "محمد جازولي" لتأسيس كورس "مجاني" لمساعده و تأهيل الزملاء الصيادلة لأمتحانات المعادله الكندية، و بدأنا تنفيذ الفكره دي فعلياً في نوفمبر ٢٠١٩.

منذ ذلك الحين، أتعرفنا علي صديقنا "محمد رشدي" اللي كان له نفس الهدف لكن بمنظور مختلف عننا شويه، و قدرنا نوحد جهودنا بشكل أكثر تنظيماً و أفاده لأكبر عدد ممكن من الزملاء، و الحقيقه لازم نقول هنا أن رشدي كان أضافه كبيره جداً و فعاله لنا بتنظيمه الرائع و المواد الدراسية و المراجع اللي أضافها.

حاليا، بيتابع و يحضر معانا أكثر من ٣٠٠ زميل و زميله، سواء عرب أو غير عرب، من الصيادلة الراغبين في أجتياز أختبارات المعادله الكندية بجزئيها، كلنا علي حد سواء بنفيد بعض و بنستفيد من بعض مهنياً و شخصياً.

دلوقتي، أنضملنا زميل رابع هو "محمد إبراهيم" عشان نعلن عن أضافه جديده لأسره "فارما فري" و هي ضم كورس المعادله الألمانيه لخدمات فارمافري للزملاء الصيادلة الراغبين في أجتياز المعادله الألمانيه،،

محمد إبراهيم بيشتغل حالياً كصيدلي في مقاطعه بادين-فورتيمبرغ في جنوب ألمانيا و هيكون هو المحاضر الأساسي في الجزء الخاص بالمعادلة الألمانيه في فارما فري و اللي هيبتدي في أكتوبر القادم إن شاء الله و بلاشك هيكون مجاني و شامل المواد التعليمية المطلوبه.

أي حد من الزملاء محتاج يسجل في أي من كورساتنا، ممكن يبعت رساله خاصه علي صفحتنا الرسمية اللي لينكها موجود في أول تعليق تحت، أو يتواصل عن طريق رقم الواتس اب ده:
+18732881309

بالنسبه لجزء المعادله الكندية، المواد التعليمية اللي تحت دي كلها هتبقي متاحه بشكل مجاني للزملاء اللي حابين يسجلوا في الكورس:

- أكثر من ١٠٠ ساعه محاضرات صوتيه لشرح المرجع الأساسي للأمتحان
Compendium of Therapeutic Choices

- محاضرات صوتيه لشرح كتاب
Compendium of Therapeutic of Minor Ailments

- بنك أسئله و حالات علاجيه (أكثر من ٣٠٠٠ سؤال)

- محاضرات صوتيه لما يقارب ال ٢٠٠ حاله علاجيه
تحضيرا لأمتحان OSCE

- مراجع دراسيه مختلفه لكل جزء في الأمتحان

ده اللي أتعمل لغايه دلوقتي و لسه فيه أضافات تانيه و تعديلات تانيه كتير هتتعمل أن شاء الله سواء لجزء المعادله الكندية أو الألمانيه.

مره تانيه، الكورسات و المواد التعليمية دي كلها مجانيه و هتفضل مجانيه، و ليس لنا غرض سوي كفايه الزملاء عن اللجوء للكورسات المبالغ فيها مادياً بدون عائد تحصيلي يستحق و فتح فرص عمل للصيادلة في ظل الوضع الوظيفي المتدهور في مصر و البلاد العربيه.

و علي المستوي الشخصي، أتمني أنه يكون فيه مجموعه زي كده تتعمل للنهوض بالمستوي المعرفي للزملاء الصيادلة داخل مصر عن طريق التعليم الطبي المستمر علي أمل أنها تكون طوق للنجاه لمهنه الصيدله في مصر اللي في رأيي المتواضع بتمر بمنعطف قاسي جداً علي المستوي المهني و المعرفي وضع الصيادلة في مواقف كتير عرضه للأستغلال و القبول بتضحيات هم في غني عنها.

الله ولي التوفيق و علي الله قصد السبيل.

رابط المنشور على الفيسبوك

صفحة Pharma Free على الفيسبوك